Evit ar wech kentañ e brezhoneg eo bet skignet war-eeun un abadenn faltazi evit ar radio.
60 den bennak a oa deuet evit an dro.
Roet e oa bet d’an arvestourien da glevout "Ar maezioù" ur pezh-c’hoari troet gant Mich Beyer diwar "The country" gant Martin Crimp.
Met da welout a oa ivez war leurenn an Artemuz. Ur gwir arvest benn ar fin !
Pep tra a oa gwelet war al leurenn gant ar publik :
- Tu porzh (tu kleiz) :
- An 3 zeknisian (Jean-Marie Ollivier, Gwenolé Peaudecerf, Gaël Hélary) a rae war dro an teknik hag ar skignañ.
- Al leurenner "mut" (Thomas Cloarec) a rene pep tra evel ur "penn laz-seniñ" gant jestroù ha sinoù d’an dud er jeu war al leurenn.
- E-kreiz :
- Paotr an trouzioù (Javier Marin Leyton). Iskiz e oa gwelout penaos eñ a rae trouzioù : kerzhout gant botoù disheñvel hervez ar pazioù a oa ret dezhañ reiñ da glevout, evañ, troc’hañ-didroc’hañ paper gant sisailhoù, trouzioù gant orjalenn ur pellgomz hag all...
- An tri c’homedian (Loeiza Beauvir, Marion Gwen ha Tony Foricheur) : er jeu penn-da-benn dirak o mikroioù o tostaat pe o pellaat diouto hervez an ezhommoù.
- Tu liorzh (tu dehoù) :
- Ar soner (Jérôme Kerihuel), azezet war al leurenn gant ur bern binviji evit plantañ aergelc’h senennoù ar pezh.
Aketus ha didrous e oa an arvestourien pep hini gant un tokarn war e zivskouarn evit bezañ soubet er pezh da vat.
Ar raktres-mañ zo bet sikouret gant ar FALB-Rannvro Breizh ha skignet war eeun war gwagennoù radioioù lec’hel. Radio Kerne a oa e penn an traoù evit ar skignañ.
Un taol kaer. Michañs e vo graet abadennoù faltazi radio ar seurt-se en dazont.
Ma n’ho peus ket bet tro da selaou an abadenn-mañ war-eeun n’eo ket re ziwezhat kit amañ evit he selaou.
